Zëvendës kryeministri Erion Braçe ka reaguar publikisht kundër prokurorit dhe provave që paraqiti dje në gjykatë prokurori Arjan Ndoji, kundër ish-drejtorit të Kadastrës në Durrës Liridon Pulën.
“Askush nga palët në këtë çështje nuk janë ankuar apo kallëzuar për procedurën e ndjekur në zyrën e shtetit. Shteti nuk i është shkaktuar ndonjë dëm, zero. Kush ka kallëzuar? Një njeri anonim. Ka kallëzuar një anonim pa lidhje për çështjen. Unë e kam këtë kallëzim që prokurori ia fshehu dje gjykatës. Ku prokuror lëvdohet për këtë kallëzim. Në asnjë resht të tij, kallëzuesi nuk përmend drejtorin për ndonjë shkelje. Ky prokuror ka marrë një kallëzim anonim. Prokurori gënjeu dje kur tha se kontratat e sipërmarrësve janë në përqindje me pjesën takuese. Unë kam të gjitha kontratat, ku pjesa takuese është me objektin për çdo pronar. “, u shpreh Braçe.
Ditën e djeshme zëvendës kryeministri Erion Braçe, i pranishëm në seancën gjyqësore të ish-drejtorit të Kadastrës në Durrës, Liridon Pula, i cili u la në burg, hodhi akuza ndaj prokurorit Arjan Ndoji.
Sipas Braçes, nga ajo çfarë ka dëgjuar në seancë, prokuroria nuk paraqiti asnjë provë për akuzën e ngritur dhe se gjithcka vjen në formë presioni për të legalizuar pallate dhe toka të bandave.
“Liridon Pula akuzohet për çështje që nuk i përkasin. Është absurde që një nënpunës i shtetit të jetë nën presionin e një prokurori që punon për grupet kriminale”, tha Braçe.
(M.Q/Faxweb.al)
