Prokuroria akuzë të re për Durim Bamin, por Gjykata e Krujës shpall moskompetencën për çështjen

Prokuroria e Krujës ka ngritur një tjetër akuzë ndaj Durim Bamit, i cili ndodhet në “arrest shtëpie” për çështjen “Doshi”.

Mësohet se mbi Durim Bamin rëndon tanimë edhe akuza për “Pastrim parash” veç saj për “Kallëzimit të rremë”. Ai akuzohet se nuk ka justifikuar blerjen e disa apartamenteve në Tiranë dhe Durrës.

Nga hetimi, ka rezultuar se i pandehuri, ka lidhur kontrata për shitblerjen dhe qiradhënien e pasurive, në zyra noteriale të ndryshme. Konkretisht në harkun kohor 2011-2015, i pandehuri ka kryer transaksione të ndryshme në fushën e “Dhënies së huasë” dhe “Blerje apartamenti” në vlerën totale 15.670.000 lekë. Nga ky total, ai ka “dhënë hua” 5 400 000 lekë, si edhe ka shpenzuar për “ndërtim të paluajtshëm” vlerën 10.270.000 lekë.

Lidhur me këtë çështje, mësohet se Gjykata e Krujës ka shpallur moskompetencën për çështjen dhe nuk shqyrton akuzat e ngritura ndaj tij.

Durim Bami, nga fshati Nikël i Krujës dhe me banim në Fushë-Krujë, u akuzua nga Tom Doshi, si personi që kishte marrë paratë nga kryeparlamentari Ilir Meta për ekzekutimin e tij. Biznesmeni 46-vjeçar nga Fushë-Kruja ra edhe pre e një atentati me minë të telekomanduar, e cila fatmirësisht nuk shpërtheu pasi u çaktivizua nga policia. (XH.A/SHUPLAKA)