Partia Demokratike me anë të një deklarate ka reaguar në lidhje me pushimin e hetimeve për ekstradimin e Nezar Seitit i cili u lirua ditën e djeshme nga Gjykata e Katanias.
PD në deklaratën e saj shton se pushimi i hetimeve është urdhëruar nga Ministrja e Drejtësisë Etilda Gjonaj, çka e ka shpëtuar atë nga burgu. Ndërkohë sipas selisë blu Gjonaj e shpërbleu Donika Prelën duke e ngritur në detyrë, pas emërimit në krye të Prokurorisë së Krimeve të Rënda.
Deklarata e plotë:
Partia Demokratike e konsideron shërbim ndaj mafias në pushtet pushimin e hetimeve për ekstradimin e paligjshëm të Nazer Seitajt, duke shpëtuar nga burgu përgjegjësen kryesore – Ministren e Drejtësisë, Etilda Gjonaj.
Pushimi i hetimit është urdhëruar pavarësisht se vetë prokurorët e çështjes kanë konstatuar shkelje flagrante të ligjit nga Ministrja e Drejtësisë Etilda Gjonaj.
Për vendimin e pushimit të hetimeve, Donika Prela, në atë kohë në krye të Prokurorisë së Durrësit, u shpërblye nga mafia në pushtet, duke u ngritur në detyrë si drejtuese e Prokurorisë së Krimeve të Rënda në kundërshtim me ligjin.
Nëse i shërben Qeverisë promovohesh. Nëse i shërben krimit të organizuar ngrihesh në detyrë dhe bën karrierë. Nëse lufton bandat dhe kriminelët shkarkohesh nga detyra. Kjo është drejtësia që po instalon në Shqipëri Edi Rama.
Discussion about this post