Të tjerë emra i shtohen listës së Prokurorisë së Krimeve të Rënda, që dyshohet se janë pjesë e organizatës kriminale që drejtohet nga Emiljano Shullazi.
“ABC News” raporton se veç të arrestuarve Emiljano Shullazi, Gilmando Dani, Endri Zela, Endri Qyqja dhe Blerim Shullazi, prokuroria po heton edhe disa persona të tjerë.
Mësohet se prokuroria prej muajsh ka nisur hetimet me metoda speciale ndaj këtyre personave.
Sipas televizionit, disa prej tyre janë identifikuar duke kryer veprime konkrete për llogari të të dyshuarve të arrestuar, apo kanë bashkëpunuar para arrestimit të tyre.
Dëshmia e biznesmenit Ylvi Beqja, e cila do bëhet mesditën e datës 27 Janar, pritet të sjellë veprime konkrete nga ana e Prokurorisë, e cila nuk përjashton as ndonjë arrestim.
Personat në fjalë dyshohet se kryejnë aktivitete në Tiranë dhe në Durrës, dhe mbajnë kontakte të vazhdueshme me të dyshuarit e prangosur.
Ndërkohë, burime nga prokuroria tregojnë se biznesmeni Ylvi Beqja ka rrëfyer para organit të akuzës se prej vitesh kërcënohet vazhdimisht nga të dyshuarit.
Sipas biznesmenit, të dyshuarit I kanë marrë atij një shumë prej 550 mijë eurosh në një periudhë të shkurtër kohore. Ai tregon se Shullazi e ka kërcënuar duke i drejtuar pistoletën në bark, se nëse nuk paguante do të vritej. (D.D/Shuplaka)
