Prokuroria nis hetimet për lëkundjet e tokës në Zharrëz, në zonën ku shpimet për naftë bëhen nga ”Bankers Petroleum”.
Pas akuzave të rënda të kryeprokurorit Adriatik Llalla për presion të ambasadorit amerikan Donald Lu për të ndërprerë hetimet rreth ”Bankers Petroleum”, hetime të cilat u ndërprenë, ”ABC News” mëson se ato kanë nisur sërish.
Prokuroria e Fierit ka nisur hetimet për lëkundjet e tokës në komunën e Zharrëzës dhe pjesëve të tjera të zonës së Fierit. Ky hetim, thonë burimet, ka nisur pasi policia e shtetit ka referuar një material shpjegues, mbështetur edhe në disa dëshmi të banorëve, të cilët pretendojnë se lëkundjet e tokës vijnë si pasojë e shpërthimeve nëntokësore që kryen kompania e nxjerrjes së naftës në atë zonë.
Në kallëzimin e policisë, që prokuroria e ka regjistruar si procedim thuhet se kërkohet të hetohet nëse lëkundjet e tokës në komunën e Zharrzës dhe zona të ndryshme të Fierit janë tërmete apo shkaktohen nga shpërthimet nëntokësore të kompanisë ”Bankers Petrolium”.
Ky hetim, thuhet nga burimet e prokurorisë ka nisur pikërisht në kohën kur disa banorë të zonës së Zharrëzës hynë në grevë urie.
Një grup ekspertësh po vlerëson nëse shpërthimet janë natyrore apo shkaktohen nga kompania naftënxjerrëse. Po kështu mësohet se janë marrë edhe dëshmitë e banorëve të zonës, të cilët vazhdojnë të këmbëngulin se lëkundjet e tokës vijnë si pasojë e shpërthimeve nëntokësore të kompanisë ”Bankers Petroleum”. Kjo duket të jetë fitorja e parë e banorëve të Zharrëzës, të cilët vazhdojnë grevën e urisë me kërkesat për ndërprerje të shpimeve dhe dëmshpërblimin për dëmet e shtëpive.(V.G/SHUPLAKA)
Discussion about this post