Gazetarja Sonila Meço ka reaguar në lidhje me zhvillimin që ka marrë fushata elektorale në vendin tonë këtë muaj zgjedhjesh.
Ajo shprehet se propaganda ka arritur fazën e parë atë të mashtrimit të njerëzve dhe vetë njerëzit kanë filluar të gënjejnë veten.
‘’Propaganda e ka kapluar fazën e parë, atë të mashtrimit të njerëzve. Tashmë ka arritur pikën nevralgjike, atë ku njerëzit gënjejnë veten. Ndaj kthejuni vetes njerëz, kërkoni brenda mureve e komunitetit cilësinë e jetës suaj.
Bëjini vetes pyetjet më elementare, a ha më mirë e shëndetshëm, a fle më i qetë, a kam mundur të kursej, a jam i kënaqur me edukimin e fëmijës, a më shpërblen puna e pensioni, a gjej derman në spitale, a gjej punë sipas meritës, a thith ajër më të pastër, a fitoj më shumë, a kam kohë për veten, a pushoj sa duhet, a mundem të shijoj kohën me fëmijën tim, a jam më i sigurt, a arrij të argëtohem cilësisht….???
Ka edhe të tjera, por edhe kaq mjaftojnë. Nuk janë pyetje programesh televizive ku dëgjoni gjithmonë të tjerët të përgjigjen edhe për ju, duke fituar ata. Është e vërteta juaj, nëse nuk mbylleni për pak çaste të dëgjoni veten, të bëni bilancet tuaja, jeni vetëm statistikë sondazhesh e do t’i duheni dreqit vetëm një herë në katër vjet. Përmidis nuk do t’i duheni as vetes’’, shkruan Meço. (E.K/SHUPLAKA)
