Kreu i Partisë Republikane Fatmir Mediu, i ftuar në emisionin “Top Story” të gazetarit Sokol Balla, zbardh takimin me diplomatin e BE-së që i kërkoi opozitës të hynin në zgjedhje.
“ Që në fillim takimi nisi në mënyrë jo të drejtë, unë që në fillim i thashë zotit Auer që është e mira që të mos arrijmë në përfundime. Ai u shpreh se ndoshta ishte më mirë që Partia Demokratike të mos hynte në zgjedhje, në këtë mënyrë ne do të merrnim më shumë mandate. Që aty e kam kundërshtuar. Nuk mendoj se i takon një përfaqësuesi ndërkombëtar që të ndërhyjë në zgjedhjet e vendit tonë.”, shprehet Mediu.
Ndërkohë Mediu shton se përfaqësuesit e BE-së e konsideruan vendimin për të mos marrë pjesë në zgjedhje si një vendim vetëm të PD-së.
“Nuk ishte normale që një përfaqësues i BE të bënte sugjerime të tilla dhe më e pakta ishte përpjekje për diversion brenda opozitës. Zyrtari i BE-së harroi që qëndrimi në raport për zgjedhjet, nuk është vetëm qëndrimi i PD, por është i gjithë koalicionit opozitar dhe tendenca për të krijuar një ndarje, ishte diversion, ishte një gjykim i cekët i një zyrtari të BE-së”, shtoi më tej ai.
Kryerepublikani mendon se vëmendja që i është kushtuar Reformës në Drejtësi, ka zbehur rëndësinë e një tjetër reforme, asaj të sistemit zgjedhor.
“Për më shumë se një vit, SHBA dhe BE ka një mungesë vëmendje në Shqipëri. Nuk kanë qenë të vëmendshme sidomos për çështjen e zgjedhjeve në Shqipëri. Ndoshta vëmendja shumë e madhe e reformës në drejtësi, ndoshta bëri që të zhvlerësohej një reformë shumë e rëndëishsme si ajo e zgjedhjeve”, thotë ai.
Pak ditë më parë, kryetari i PBDNJ-së deklaroi se diplomatë të huaj i kërkuan që të hynte në zgjedhje, pasi në mungesë të PD-së mund të sigurojë më shumë deputetë. Sipas Dules një diplomat i rëndësishëm, edhe në prani të 4-5 aleatëve të tjerë të Partisë Demokratike, u ka bërë atyre një ofertë të pistë, ose më saktë kriminale për parametrat e demokracisë.
Më vonë doli se këta diplomatë ishin, ambasadorja e Bashkimit Euopian në Shqipëri, Romana Vlahutin. Ajo së bashku me Eduard Auer, shef i Divizionit për Ballkanin Perëndimor më datën 6 Prill, nga ora 17:30-18:30, ka organizuar një takim me aleatët kryesorë të Lulzim Bashës, Vangjel Dule, Dashamir Shehi dhe Fatmir Mediu. (D.D/Shuplaka)
Discussion about this post