Deputeti i Partisë Demokratike, Aldo Bumçi, shprehet se opozita është detyruar të ndërmarrë një protestë për shkak të disa shetësimeve.
I ftuar në emisionin “Top Story” të Sokol Ballës, Bumçi tregon se këto shqetësime kanë të bëjnë me kanabizimin dhe dekriminalizimin e vendit.
“Ne nuk pranojmë të bëhemi fasada demokratike sepse po të bëhemi të tillë, ne nuk do të ishim opozita e vendit. Ne nuk jemi një vend normal dhe ne nuk mund të sillemi sikur s’po ndodh më. Vendi është i mbjellë me kanabis. Nuk mund të ketë fushatë elektorale në një vend të mbjellë me kanabis. Kemi banda kriminale që janë në nivelet më të larta të pushtetit dhe jo si zhvillim aksidental, por si vullnet i qartë i Edi Ramës që do të zhbëjë dekriminalizimin.”, tha deputeti.
Megjithatë, ai ka një zgjidhje për të përmirësuar situatën e vendit, dhe për ta shpjeguar idenë e tij ai merr si shembull Maqedoninë.
“Si në rastin e Maqedonisë, ku u largua Gruevski, u formua një qeveri teknike dhe vendi shkoi në zgjedhje. Nuk ka kohë për zgjidhje tjetër. Kjo është më e vogla e mundshme. Nëse Edi Rama do të kishte treguar vullnet për dekriminalizimin, të kishte luftuar kanabisin, do të ishte një situatë tjetër. Por Edi Rama nuk dëshiron ta bëjë këtë dhe alternativa jonë është rruga. Rama po zhduk mekanizmin e zgjedhjes dhe kjo është arsyeja madhore që ne po dalim në rrugë”, u shpreh Bumçi.
Megjithatë, Bumçi sqaron se nuk kërkon largimin e kryeministrit Rama pa mbaruar akoma mandatin, por thjesht kërkon që zgjedhjet të bëhen me qeveri teknike. (D.D/Shuplaka)
