Protesta e planifikuar nga opozita për orën 17:00 ka vënë në lëvizje Policinë e Shtetit, e cila ka marrë masa të rrepta sigurie për të menaxhuar çdo situatë të mundshme. Sipas burimeve policore, mbi 1,200 efektivë të rendit, përfshirë forcat speciale FNSH, njësinë “Shqiponjat” dhe forcat RENEA, do të jenë të pranishme në terren për garantimin e rendit dhe sigurisë publike.
Përveç Policisë së Shtetit, edhe Garda e Republikës është vënë në gatishmëri të plotë për mbrojtjen e institucioneve shtetërore. Efektivët e dislokuar në protestë do të jenë të pajisur me maska kundragaz, ndërsa janë përgatitur edhe pesë autobotë me ujë për ndërhyrje në rast të ndonjë incidenti.
Si në çdo protestë të mëparshme, perimetri rreth Kryeministrisë do të ruhet nga një kordon policor, ndërsa dyert e godinës janë të blinduara me veshje metalike për të parandaluar çdo tentativë të hyrjes me forcë. Gjithashtu, përgjatë bulevardit “Dëshmorët e Kombit” janë instaluar kamera me rezolucion të lartë për monitorimin e situatës në kohë reale.
Në terren do të jenë të pranishëm edhe agjentë civilë, të cilët do të mbikëqyrin zhvillimin e protestës dhe do të raportojnë në kohë çdo zhvillim të rëndësishëm.
Ndërkohë, një ditë më parë, drejtori i përgjithshëm i Policisë së Shtetit, Ilir Proda, ka mbledhur drejtuesit e strukturave të rendit dhe sigurisë, si dhe shefat e komisariateve të Tiranës, për të diskutuar strategjinë e menaxhimit të protestës. Ai ka dhënë udhëzime të qarta që efektivët të veprojnë me përmbajtje, të shmangin çdo provokim dhe të ndërhyjnë vetëm në raste të domosdoshme për të garantuar rendin publik.
Policia mbetet në gatishmëri të plotë, ndërsa vijon koordinimi mes strukturave të sigurisë për të siguruar një protestë pa incidente dhe për të garantuar mbarëvajtjen e tubimit.
Discussion about this post