I ftuar në studion e Fax News, pedagogu i Fakultetit Ekonomik në Tiranë, Rezart Prifti u shpreh se me iniciativën e tij është diskutuar me rreth 500 studentë që të zgjidhen 10 përfaqësues për të realizuar një takim me Kryeministrin për të diskutuar rreth 8 pikave që përmban kërkesa e studentëve.
Ai tha se me mënyrën se si po zhvillohet protesta, ku dikush kërkon supë, dikush fasule, dikush tarifën dhe askush se merr vesh se çfarë flitet në shesh, studentët nuk do të fitojnë asgjë.
“Kemi vendosur të zgjedhim 10 përfaqësues që të dialogojnë me Ramën. Kjo nuk është negociatë, askush nuk ka kërkuar negociata, madje as kryemnistri. Problemi është se nuk mund të thuash se nuk dua dialog kur vetëm dialogu dhe komunikimi mund t’i japin zgjidhje kësaj situate. Mohimi i komunikimit dhe dialogut dhe thirrja kundër tyre është e pakonceptueshme dhe butaforike,” – Tha Prifti.
Ai u shpreh se është plotësisht në mbështetje të protestës dhe kërkesave, por nuk mund të thuash, – tha ai – se unë dua këtë gjë dhe nga ana tjetër të mos hapësh gojë.
“Hajde ikim si nomadët, të dalim të gjithë në rrugë dhe themi se nuk duam dialog. Pse 8 kërkesat e studentëve nuk u shpjegohen njerëzve por dalin disa të gjithëditur nëpër studiot televizive duke bërë si ekspertë të pavarur. Studentët nuk duhet të bëhen mish për top,” – tha Prifti.
Prifti është akuzuar nga disa segmente të protestës se është njeri i Monika Kryemadhit dhe mbështetës i saj. I pyetur për këtë ai tha se, – “unë me Monika Kryemadhin kam aq lidhje sa ç’kam me Kim Kardashian”.
Ne kemi kërkesë nga studentët për t’i ndihmuar në organizim, për të artikuluar pikat e kërkesave, dhe i kemi ndihmuar.
Pedagogu e mbylli intervistën duke thënë se nuk duhet t’jua varim këto topa në qafë studentëve. Sipas tij, kjo është detyrë e pedagogëve që t’iu vënë drynin dyerve të zyrave dhe t’i dalin edhe vetes për zot.
“Reformën nuk e bëjnë studentët, më thoni një pikë të reformës së arsimit të lartë që e njohin studentët”.
(F.GJ/FAXWEB.AL)
Discussion about this post