Dhoma e tregtisë ka dalë në një konferencë për mediat ku kanë dënuar shkatërrimin e pronës gjatë protestës që ka ndodhur në Kukës.
Sipas kreut të dhomës së tregtisë Nikolin Jaka asnjë biznesmen nuk mund të quhet oligarkë, sa kohë që ka kontrata të rregullta me shtetin.
Në deklaratën e Dhomave të Tregtisë thuhet se aktet e dhunës ndaj sipërmarrjes private janë të patolerueshme, ndërsa thekson me rëndësi dialogun me qeverinë dhe koncesionarin për lehtësimin e tarifës për përdoruesit ekonomik dhe tregtarë me frekuencë të lartë
“Të hapet dialogu mes qeverisë dhe sipërmarrjes për të parë skemat e lehtësimit për përdoruesit e shpeshtë. Kemi pasur takim me firmën koncesionare e cila na informoi mbi mundësitë dhe hapësirat që mund të ketë sipërmarrja. Kundërshtojmë me forcë dhunën dhe vandalizmin ndaj çdo sipërmarrësi privat”.
“Dënojmë çdo akt vandal që ka shkatërruar një pasuri të sipërmarrjes private. Nëse ne e neglizhojmë këtë fakt atëherë secili prej nesh duhet ta braktisë këtë vend. Nëse themi do kundërshtojmë një taksë pa bërë analizë, hajde ta kundërshtojmë pa bërë analizë.
Rruga e Kombit është tashmë një procedurë 10 vjeçare e dështuar, nuk është hera e parë që tentohet të jepet me koncesion. Sipërmarrja shqiptare është normalisht e orientuar për sa më pak tarifa, jemi të orientuar për kosto të lira, por duhet të bëjmë edhe analizën e sipërmarrësit investues i cili është njëri prej nesh.
Nëse i hidhemi në sulm një sipërmarrësi që ka financuar një shumë të konsiderueshme në këtë objekt koncesioni, atëherë ne i bie që mbajmë njërën anë. Ajo që kemi takuar sot në takim me koncesionarin ka qenë që të ketë favorizim dhe ulje të ndjeshme të taksës për përdoruesit e shpeshtë e cila do të bëhet pas 6 muajsh. Dënojmë rëndë vandalizmin dhe mbështesim sipërmarrësit”, u shpreh Jaka.
Nga ana tjetër biznesmeni Luan Bregasi është shprehur se e ardhmja e vendit janë koncesionet.
‘’Tingëllon pak e vrazhdë, po e ardhmja e vendit janë koncesionet. Ka vend për të diskutuar në lidhje me tarifat”, u shpreh Bregasi.
(E.K/FAXWEB.AL)
