Pas publikimit të rezultateve të provimeve të Maturës shtetërore, Agjencia Kombëtare e Provimeve thotë se ka patur një nivel të mirë të përgatitjes së nxënësve.
Ky institucion lajmëron se në gati 38 mijë maturantë, 332 prej tyre kanë kapur pikët maksimale dhe shpërndarja e këtyre të fundit ka qenë në të gjitha rrethet.
“Nxënësit që kanë marrë maksimalen në të dyja provimet, pra 40 pikë, kemi 16 të tillë, ndërkohë janë 332 maturantë të cilët kanë marrë qoftë edhe në një test pikët maksimale. Shkolla mjaft të mira, si në Tiranë edhe në rrethe, kemi maturantë shumë të mirë në të gjitha rrethet të cilët kanë marrë pikët maksimale, ose edhe pikë i çojnë në notën 10”, njofton Rezana Vrapi, drejtoresha e AKP.
Nga ana tjetër, drejtoresha Vrapi thkson se përsa i përket kalueshmërisë, më e ulët është ajo me zgjedhje.
“Përgjithësisht ne kemi bërë disa rezultate paraprake në lidhje me 5 provimet, edhe përse tani është pak herët të japim rezultate për lëndët me zgjedhje. Për provimin e Gjuhës së huaj dhe asaj shqipe, kalueshmëria shkon në 97 %, në matematikë 91%, kurse në lëndët me zgjedhje 88.74% si kalueshmëri.”, thekson Vrapi.
Sakaq, kujtojmë se brenda pak ditëve, do të publikohet dhe gjimnazi me maturantët më të mirë të maturës shtetërore 2016-2017, duke u bazuar në rezultatet e provimeve. (D.D/Shuplaka)
Discussion about this post