Pse Grida Duma nuk bën një fëmijë të dytë: E them në mënyrë metaforike, nuk duhet të jemi si të lindur nga majmuni

Politikania Grida Duma ka rrëfyer arsyen përse nuk ka një fëmijë të dytë, përveç djalit që tashmë i ka mbushur 12 vjeç. E ftuar në emisionin “Mos i fol shoferit” me Rudina Dembaçaj, ajo është pyetur për këtë pjesë private të jetës së saj jashtë kornizave të politikës.

Faktin e vetëm një fëmije, Grida Duma e argumenton me faktin se fëmija është përgjegjësi ekonomike, ndaj duhet menduar mirë. Përpos kësaj, ajo tregon se i biri Darjeni, është një fëmijë egoist, që nuk dëshiron motër ose vëlla.

Pjesë nga intervista:

“Pse vetëm me djalin? Pse vetëm një djalë dhe mos është kjo arsyeja për të mbajtur trupin në formë? Unë e di që ti ke Darjenin, pse e ke lënë vetëm Darjenin?

Së pari, nuk ka lidhje fare me gjendjen fizike. Përpara se të lindte Darjeni kam pasur haluçilacione peshe shumë më të këqija sesa pasi erdhi Darjeni. Pesha, trupi, gjithçka tjetër është tek vullneti mendor, mendoj unë. Edhe mënyra si sillemi me veten.

Besoj se kështu shkoi. Unë gjithmonë mendoj se fëmijët janë përgjegjësia jonë nëse i sjellim në jetë. Dhe nëse i sjellim në jetë, deri në një moshë të caktuar duhet të kuptojmë se nuk na e kërkuan, morrëm ne përgjegjësinë dhe për këtë kemi përgjegjësinë që bazamentet e rëndësishme t’ia krijojmë.

Që do të thotë, unë kam nisur të punoj… nuk dua të bëj atë reklamën e zakonshme por nuk kam punuar pak për hir të së vërtestës, që në moshën 19 vjeçe me përkthime ndërkohë që isha në fakultet.

Sigurisht nuk dua dhe nuk kam dashur asnjëherë që fëmija im t’ia nisë nga zero. Nuk e nënkuptoj këtë që duhet t’i ketë gjërat gati, kurrsesi, madje jam nga ata prindër që them “Pas një minimum nuk kemi detyrime më bashkë”.

E them në mënyrë metaforike, nuk duhet të jemi “si të lindur nga majmuni”, pra nisur nga zero. Diçka duhet lënë. Erdhi vonë për shkak se kushtet në jetë u krijuan më vonë, unë e dija që do duhet të kishim edhe shtëpinë, edhe një lloj të ardhure normale, standarde. Një fëmijë sot është përgjegjësi ekonomike.

Kërkon Darjeni ndonjë motër ose vëlla?

Jo, është egoist kështu. Thotë “Për çfarë të duhet? Mjaftoj unë.” I them “Do ngelësh vetëm” dhe më thotë “Edhe ti vetëm je, dy motra ke, po s’i ke fare”, pasi motrat e mia janë në Amerikë.

(XH.A/SHUPLAKA)