Policia e Shkodrës ka vënë në pranga 30- vjeçarin Alfons Jakun pasi akuzohet se i ofroi rryshfet një efektivi të Rrugores.
Sipas policisë arrestimi i 30-vjeçarit u bë pasi, në aksin rrugor Mjedë – Shkodër, i ka ofruar 1000 lekë punonjësit të policisë së qarkullimit rrugor, me qëllim që ti shmangej masës administrative pasi po qarkullonte pa rrip sigurimi. Në videon e publkuar nga vetë policia dëgjohet polici që pyet shoferin “pse i dhe lekë policit?”. Ndërsa shoferi përgjigjet, “për një kafe për qejf”.
Detaje:
“Nga Seksioni Kundër Korrupsionit në D.V.P-Shkodër, u kryen të gjitha veprimet hetimore ku shtetasi u arrestua në flagrancë për veprën penale “Korrupsion aktiv ndaj personave që ushtrojnë funksione publike” parashikuar nga neni 244 i Kodit Penal. Materialet proçeduriale iu referuan Prokurorisë së Rrethit Gjyqësor Shkodër për veprime të mëtejshme”, thuhet në njoftimin e Policisë. (J.V/Shuplaka)
