Presidenti Bujar Nishani ende nuk ka dekretuar asnjë datë për zgjedhjet në Kavajë, pavarësisht situatës politike të tensionuar, ku opozita kërkon qeveri teknike dhe paralajmëron për një bojkot të mundshëm nëse nuk krijohet një qeveri teknike.
Top Channel ka kontaktuar me Zyrën e Shtypit të Presidencës, e cila bën me dije se deri më tani nuk ka marrë asnjë njoftim zyrtar nga Gjykata Kushtetuese për këtë rast, e për këtë arsye nuk ka ende një dekret të kreut të shtetit, i cili sipas Kodit Zgjedhor, ka 48 orë afat për të dekretuar datën e zgjedhjeve.
Por Gjykata Kushtetuese është shprehur me një vendim më 7 mars për rrëzimin e kërkesës së Elvis Roshit, për dekriminalizimin dhe mandatin e kryebashkiakut. Mirëpo ende nuk e lajmëruar presidencën mbi ktë proces, ndryshe nga çka vepruar me rastin e Shukri Xhelilit në Dibër, në gusht të 2016-ës.
Kështu data e zgjedhjeve të parakohshme në Kavajë, ka mbetur ende në duart e Gjykatës Kushtetuese. (D.D/Shuplaka)
Discussion about this post