Në takimin e tretë për sot me krerët e partive parlamentare aleate, kreu i opozitës Lulzim Basha u tha atyre se kryeministri Edi Rama nuk pranon shtyrjen e zgjedhjeve pas 18 qershorit.
Ndërkohë që në fund të ditës së sotme, pritej më në fund një marrëveshje, kjo për shkak edhe të afatit prej 24 orësh që zëvendës ndihmësi i sekretarit amerikan të shetit, Hyot Brian Yee, u kishte lënë palëve për të pranuar një paketë të ngjashme me atë të McAllister, të pagëzuar si McAllister Plus.
Por negociatat mes Ramës dhe Bashës duket se kanë ngecur pikërisht te data e zgjedhjeve. Edhe pse më parë, sipas burimeve për “Shuplaka-n” mësohej se Basha e kishte pranuar Paketën McAllister Plus, Rama në fund të ditës nuk pranoi për shkak të datës së zgjedhjeve.
Në të njëjtin mendim është edhe analisti Robert Rakipllari, i cili mbrëmjen e sotme i ftuar të “Studio e Hapur” tha që kjo është pika që ndan palët.
“Unë di që Rama ka pranuar në parim paketën për shtyrje deri në një muaj, opozita identifikim biometrik dhe numërim elektronik, kjo është pika që ndan palët dhe nuk besoj se do të arrihet në një marrëveshje.
Unë besoj se opozita ka për të dhënë një përgjigjë pozitive, pasi për dy vite pavarësisht se ka qenë Reforma në Drejtësi çështja kryesore, ka kërkuar edhe identifikimin biometrik dhe numërimin elektronik, gjë e cila është lënë pas dore.”, tha Rakipllari.
Vizita e Zv/Ndihmës Sekretari amerikan i Shtetit, Hoyt Brian Yee në vendin tonë është pritur me shumë optimizëm. Shumëkush e ka quajtur këtë shansin e fundit për t’i dhënë një zgjidhje krizës politike por ka patur edhe të tjerë të pashpresë se zgjidhje nuk do të ketë. Por siç duket, këta të dytët i paskan rënë pikës. (D.D/Shuplaka)
