Është zbardhur njoftimi i paralajmëruar i Partisë Demokratike në Komisionin Qendror të Zgjedhjeve. Në një konferencë për mediat, deputeti i PD-së, Oerd Bylykbashi u shpreh se ka skaduar afati i regjistrimit të listave të kandidatëve për deputetë.
Ai theksoi se nëse KQZ shkel këtë afat të skaduar prej mesnatës, do të shkelte ligjin nëse do t’i regjistronte sot.
“Ka skaduar afati. Çdo regjistrim listash do të përbënte shkelje. KQZ nuk ka asnjë mundësi ligjore të regjistroje listat, nuk ka mundësi ligjore për të ndryshuar rregullat. Do jetë haptazi një paligjshmëri. Nga dita e sotme askush nuk regjkistron dot më lista. Ka përfunduar ligjërisht nga mesnata, ka rënë dekreti i Presidentit.”, u shpreh ndër të tjera Bylykbashi.
Reagimi i plotë i Bylykbashit:
“Me datë 28 prill në mesnatë ka skaduar afati i regjistrimit për kandidatë në parlamentin e Shqipërisë. Që pas kësaj date, askush nuk mund të regjistrojë më lista. Çdo regjistrim i listave në KQZ do të ishte shkelje e ligjit. Kodi Zgjedhor është shumë i qartë. Listat e kandiatëve të partive politike apo edhe e kandidatëve të pavarur, regjistrohen jo më vonë se 50 ditë para datës së zgjedhjeve. Data e dekretuar e zgjedhjeve është 18 qershor, e cila fillon në orën 00.00 dhe nuk llogaritet në afat, kështu që dita e 50-të përpara kësaj date është data 29 prill në ora 00.00 sot në mëngjes.
E për rrjedhojë çdo regjistrim që do të bëhej gjatë ditës së sotme do të ishte i paligjshëm sepse do të ishim para 49-të ditësh e disa orësh. Komisioni Qendror i Zgjedhjeve nuk ka më asnjë mundësi ligjore të regjistrojë lista. Nëse e bën është duke shkelur ligjin. Komisioni Qendror i Zgjedhjeve dhe askush tjetër nuk ka asnjë mundësi ligjore për të ndryshuar Kodin Zgjedhor, për të ndryshuar rregullat. Nëse e bën do të jetë haptazi jo vetëm në një paligjshmëri por haptazi edhe në një veprim të njëanshëm politik e partizan që nuk është aspak çudi me qendrimin që ka treguar deri tani, por kjo do të ishte një paligjshmëri e hapur.
E theksoj, nga dita e sotme askush nuk regjistron më lista dhe nga dita e sotme ose më mirë të themi nga mbrëmë në mesnatë ka përfunduar ligjerisht, përveçse politikisht, edhe kjo farsë që u quajtën zgjedhjet e dekretuara më 18 qershor. Praktikisht dhe ligjërisht ka rënë edhe dekreti i Presidentit. E vetmja mënyrë që shqiptarët nga sot e tutje të votojnë të lirë në zgjedhje të lira dhe të ndershme është një marrëveshje gjithëpërfshirëse politike e cila do ti mundësojë ata në një moment tjetër të votojnë me kushte të tjera dhe jo me këto që imponon kjo maxhorancë”.
(XH.A/SHUPLAKA)
Discussion about this post