Edhe pse tashmë ka rënë nga Kategoria, Tirana ka një shans sot për të rifituar sadopak nderin e humbur. Në Elbasan luhet sot finalja e Kupës mes Tiranës dhe Skëndërbeut.
Dhe korccarët në fakt nuk kanë marrë më të mirën nga ky sezon pasi nuk arritën të ruanin dot titullin kampion.
Ndërsa për Tiranën vlen shumë më shumë se një trofe që do i shtohet arkivës, pasi përkthehet me parà. Favorit përballë korçarëve nuk janë, jo vetëm prej gjendjes psikologjike, por edhe diferencave që kanë në fushë. Por, motivimi i skuadrës së Mirel Josës mund të shtohet kur bën llogaritë, pasi kjo Kupë mund t’i shërbejnë për “ngjitjen” në Superiore.
Federata Shqiptare e Futbollit, sikundër dihet, ofron 50 milionë lekë të vjetër për këtë trofe. Dhe nëse kryeqytetasit dalin fitimtarë nga “Elbasan Arena”, atëherë automatikisht fitojnë të drejtën që të jenë pjesëmarrës në raundin e parë në Ligën e Europës. Vetëm me pjesëmarrjen e “arkës” së tyre, veç shpërblimit të FSHF-së, do i shtoheshin 215 mijë euro.
Dhe nëse kalojnë turin e parë të këtij kompeticioni, do të merrnin edhe 225 mijë euro të tjera. Me një buxhet prej afro 477 mijë eurosh, drejtuesit e klubit më të titulluar në vend do të kishin mundësinë që të ndërtonin një ekip solid, që nuk do diskutonte ngjitjen e shpejtë në elitë.
Pra “agonia” në Kategorinë e Parë, një ligë që do ta provojnë për të parën herë në historinë e tyre afro 97-vjeçare, mund të zgjaste vetëm një sezon. Nëse presin një “biletë” për në Europë, pa dyshim që edhe lojtarët do ta shihnin me tjetër sy Tiranën në merkato. Nëse inferiorja nuk shihet me sy fort të mirë prej futbollistëve cilësorë, nuk do mendoheshin dy herë t’i thoshin “po” Tiranës në qoftë se do ishte në zonën “Euro”.
Discussion about this post