Ministria e Arsimit i është përgjigjur denoncimit të bërë gjatë ditës së sotme nga ish-kryeministri, Sali Berisha i cili ka bërë publike situatën në qytetin e Kukësit ku sipas tij, maturantëve po iu bëhen lëshime kundrejt votës (lexo këtu).
MASR deklaron se lajmet e bëra publike janë dezinformime që dalin kryesisht nga anëtarë të PD-së dhe shton se kjo nuk është aspak një gjë e re.
“Kjo nuk është aspak një gjë e re! Sa më rigoroz është testi dhe administrimi nga ana e MASR, aq edhe më të shpeshta janë dezinformimet e tyre, të cilat i dënojmë fuqishëm!”, shkruhet në reagim.
Reagimi i plotë:
Periudha e maturës shtetërore përballet çdo vit me lajme të rreme për keqadministrim të testit nga ana e MASR. Këto dezinformime dalin kryesisht nga anëtarë të PD duke e përshirë edhe këtë proces plotësisht teknik, por të rëndësishëm për nxënësit, në betejën e ulët politike të opozitës.
Kjo nuk është aspak një gjë e re! Sa më rigoroz është testi dhe administrimi nga ana e MASR, aq edhe më të shpeshta janë dezinformimet e tyre, të cilat i dënojmë fuqishëm!
MASR nënvizon se do të vazhdojë të përmirësojë testin dhe administrimin e procesit deri në digjitalizimin e plotë të tij. Ky vit ka ardhur me risi sepse një pjesë e testeve do të vlerësohen për herë të parë elektronikisht duke shmangur gabimet njerëzore që mund të jenë bërë në vitet e kaluara, ndërkohë që janë shtuar edhe penalitetet për ata që do të mundohen të kopjojnë.
Njëkohësisht, falënderojmë edhe Policinë e Shtetit për ndihmën e saj në ruajtjen dhe shpërndarjen e testeve dje dhe sot.
Suksese të gjithë maturantëve në vijim për provimet e rradhës!
(F.GJ/FAXWEB.AL)
Discussion about this post