Kur kanë mbetur dhe pak minuta nga starti i ndeshjes së parë të Shqipërisë në Ligën e Kombeve, përballë Izraelit në “Elbasan Arena”, Panucci ka zyrtarizuar edhe formacionin.
Në mbrojtje, i zakonshmi Hysaj në të djathtë dhe Gjimshiti e Veseli në qendër, me këtë të fundit që ka fituar balotazhin me Mavrajn, dhe në të majtë do të zbresë mbrojtësi debutues, Binaku.
Në mesfushë tekniku italian ka vendosur t’i besojë eksperiencës së Xhakës, Bashës dhe Memushajt, të cilët dinë të ruajnë balancat, duke mbyllur hapësirat në prapavijë dhe duke ndihmuar në organizimin e sulmeve.
Sa i përket sulmit, surpriza e vetme është ish sulmuesi i Skënderbeut, Enis Gavazaj, i cili do ta nisë takimin si titullar në të majtë të sulmit, duke përfituar nga mungesa e Eros Grezdës, që vjen pas një dëmtimi të gjatë dhe nuk do të jetë gati për takimin e sotëm.
Në të djathtë të këtij reparti do të luajë Jahmir Hyka, i cili do të mbajë edhe shiritin e kapitenit, pasi ka më shumë takime me Kombëtaren, ndërsa duelin shkodran për majën e sulmit e ka fituar sulmuesi i Oostendes në Belgjikë, Sindrit Guri.
Shqipëria: Strakosha; Hysaj, Gjimshiti, Veseli, Binaku; Basha, Memushaj, Xhaka; Gavazaj, Hyka (C), Guri
Izraeli: Guy Haimov (GK); Eli Dasa, Ayad Habashi, Nisso Kapiloto, Bibras Natcho (C), Eran Zahavi, Beram Kayal, Munas Dabbur, Sheran Yeini, Taleb Twatha, Dor Peretz.
