Publikohet lista me 365 ish-të përndjekurit, cilat janë kategoritë përfituese

Ministria e Financave ka publikuar listën me 365 të përndjekur që duhet të dorëzojnë dokumentacionet për të përfituar nga procesimi i kategorive të prapambetura, respektivisht këstet 4, 5, 6.

Ndër dokumentet që ata duhet të dorëzojnë janë: certifikatë personale + numër i përditësuar i llogarisë bankare.

Në listën e përfitueseve përfshihen disa kategori, të renditura nga “Gazeta Shqiptare”. Mes atyre që përfitojnë janë: ish-të dënuarit politikë që nuk jetojnë dhe që kanë trashëgimtarë të radhës së parë, të cilët janë në moshë të mitur me hyrjen në fuqi të këtij ligji dhe që jetojnë në momentin e dhënies së pagesës dhe që kanë moshë nën 75 vjeç me hyrjen në fuqi të këtij ligji.

Gjashtë kategoritë përfituese

1. Për kategorinë e parë parësore, ish-të dënuarat politike gra, që jetojnë; për kategorinë e dytë parësore, ish-të dënuarit politikë, që jetojnë dhe janë mbi 75 vjeç me hyrjen në fuqi të këtij ligji; për kategorinë e gjashtë parësore, ish-të dënuarit politikë që jetojnë, të cilët kanë moshë nën 75 vjeç me hyrjen në fuqi të këtij ligji.
2. Për kategorinë e tretë parësore, ish-të dënuarit politikë, të cilët vuajnë nga sëmundje të rënda.
3. Për kategorinë e katërt parësore, ish-të dënuarit politikë që jetojnë në momentin e dhënies së pagesës, të cilët pavarësisht nga mosha, kanë pasardhës të radhës së parë në moshë të mitur, me hyrjen në fuqi të këtij ligji.
4. Për kategorinë e pestë parësore, ish-të dënuarit politikë që nuk jetojnë dhe që kanë trashëgimtarë të radhës së parë, të cilët janë në moshë të mitur.
5. Kur ish-i dënuari politik që jeton ose trashëgimtari ligjor humbet zotësinë juridike për të vepruar, me vendim gjykate i është përcaktuar kujdestari ligjor, në këto raste veprimet nga Ministria e Financave bëhen në emër të personit me këtë të drejtë.
6. Ish-të dënuarit politikë që jetojnë ose trashëgimtari ligjor kanë të drejtë ta delegojnë me prokurë të posaçme, tërheqjen e dëmshpërblimit financiar. Në këto raste, veprimet nga Ministria e Financave kryhen në emër të personit me këtë të drejtë.

(XH.A/SHUPLAKA)