Fëmijët e shkollave të mesme dhe nëntë-vjeçare blejnë dhe konsumojnë lirisht hashash.
Ky skandal është denoncuar nga emisioni investigativ “Fiks Fare”, i cili solli pamje nga disa shkolla ku fëmijët e shisnin dhe blinin lirisht lëndën narkotike.
Një nga filmimet është bërë në Shkollën e Mesme profesionale të Kamzës, ku gazetarët e Fiksit kanë biseduar me disa djem gjatë pushimit të madh.
Njëri nga djemtë i premton gazetarit se do ta ndihmojë për t’i gjetur hashashin, por i duhet të bisedojë me një shokun e tij.
Ndërsa një tjetër nxënës afrohet dhe e pyet gazetarin se për kur e do, dhe tregon se është edhe vetë përdorues.
“Unë përdorues jam, po s’kam për momentin. Sa të shkoj e ta marr”, është shprehur djali.
Nuk kalon shumë por vetëm 30 minuta, dhe zbulohet një shitës i cili tregon se ka dy teke, domethënë dy doza hashashi.
Një histori e ngjashme ka ndodhur edhe në shkollën 9-vjeçare “Aleks Buda” në Laprakë.
Kamera e Fiksit nuk është fokusuar vetëm te konsumimi I hashashit, por edhe i duhanit. Në një shkollë në Vlorë, kamera e Fiksit ka treguar nxënës të cilët pinin lirisht duhan, pa u penguar nga stafi akademik i shkollës. E njëjta situatë me konsumimin e duhanit, paraqitej edhe në Elbasan. (D.D/Shuplaka)
