Një tjetër skandal është publikuar sot nga emisioni investigativ “Fiks Fare”. Zjarrfikësia e Krujës me një automjet të paliçensuar dhe me një tjetër të amortizuar i shërben qytetit dhe mbi 40 fshatrave të Fushë-Krujës dhe Mamurrasit.
Përveç kësaj, mësohet se zjarrëfikësit përdorin para nga xhepi për mirëmbajtjen e automjetit të vitit ’70.
Një automjet me ujë dhe një tjetër i paliçensuar janë gjithçka kanë në dispozicion tre punonjësit e turnit, të cilët u shërbejnë jo vetëm Krujës, por edhe Fushë-Krujës e Mamurrasit me këtë infrastrukturë.
Shefi i turnit të Zjarrfikëses tregon për gazetarët se pavarësisht se automjetit i është bërë shërbim herë pas herë nga vetë punonjësit, ai sërish paraqet problem pasi është amortizuar totalisht.
“Nuk ka investime fare edhe shërbimin e ka bërë shefi me paratë e veta. Automjeti do dy-tre minuta kohë të ngrohet pastaj të lëvizë, por zjarri nuk fal. Ndërsa automjeti i aksidenteve është i pa regjistruar. Na i kanë dhuruar vite më parë, është pa letra por ne e përdorim nga halli për t’i ardhur në ndihmë njerëzve”, tregon shefi zjarrfikëses.
Ndër të tjera ai tregon se probleme më të mëdha hasin me infrastrukturën kur duhet të ndërhyjnë në fshatra. Për këtë shkak ata vonohen për të dhënë ndihmën e shpejtë.
Ndërkohë, nënkryetari i Bashkisë së Krujës Gjon Bardhi e pranon situatën e vështirë të punonjësve të Zjarrfikëses.
“Jemi në dijeni të situatës, po këto janë makina të vjetra të cilat kanë kosto të lartë edhe për t’u regjistruar. Kjo. pasi janë të një vit prodhimi shumë të vjetër dhe gjobat ndër vite shume të larta”, shprehet Bardhi.
Megjithatë ai shton se bashkia po planifikon buxhetin për të rregulluar këtë situatë.
“Ne jemi në fazën e bërjes së buxhetit. Do të shohim një mundësi për të investuar në këtë shërbim. Gjithashtu do të mundohemi të gjejmë edhe donatorë”, shton nënkryetari.
Sakaq, lidhur me automjetin e paliçensuar Bardhi sugjeron të mos përdoret duke patur parasysh se përbën një shkelje ligjore.
“Ky mjet, mesa di unë, nuk ka pasur synime të përdorej. Është e vërtetë që ligjet janë ligje, nuk ka pasur justifikime për t’u përdorur. Por, siç e thashë edhe më lart, është kosto shumë e madhe regjistrimi i tij. Nuk jam në dijeni që përdoret, por do sugjeroja të mos përdorej”, shprehet nënkryetari. (D.D/Shuplaka)
