Kryetarja e Kuvendit të Shqipërisë, Elisa Spiropali, mori pjesë sot në ceremoninë e prezantimit të vëllimit të dytë të udhërrëfyesit për jurisprudencën e Gjykatës Kushtetuese, një dokument me rëndësi të veçantë për sistemin ligjor dhe institucional të vendit.
Në fjalën e saj, Spiropali vlerësoi rolin kyç të Gjykatës Kushtetuese në konsolidimin e shtetit të së drejtës dhe theksoi se vendi ndodhet në një moment të rëndësishëm historik.
Duke iu referuar udhërrëfyesit të jurisprudencës, kryeparlamentarja nënvizoi se ky botim përbën një mjet të rëndësishëm për të kuptuar dhe zbatuar vendimet kushtetuese në praktikën institucionale dhe ligjore të Shqipërisë.
Dokumenti i prezantuar synon të rrisë transparencën, kuptueshmërinë dhe koherencën në vendimmarrjen gjyqësore, duke i shërbyer si juristëve, institucioneve publike, ashtu edhe publikut të gjerë.
