Deputetja e Lidhjes Demokratike të Kosovës, Vjosa Osmani, ka reaguar ashpër ndaj deklaratës së Nasim Haradinajt i cili duke iu referuar aktivistëve të vrarë të LDK-së kishte deklaruar “Punë e madhe që janë vra anëtarët e LDK-së”. Osmani ka deklaruar se një deklaratë e tillë e nënkryetarit të OVL-së së UÇK-së dëshmon se Gjykata Speciale doemos duhet të merret me hetimet për vrasjet e aktivistëve të LDK-së pas luftës.
Ajo tha se krerët e shtetit duhet urgjentisht të distancohen ndaj deklaratave të tilla dhe kërkoi që Nasim Haradinaj të mos lejohet të hyjë në Kuvend dhe të kërcënojë deputetët, siç tha ajo, ashtu siç ka bërë ai në mandatin e kaluar.
“Deklarata e Nasim Haradinajt është deklaratë çnjerëzore. Ajo jo vetëm që dëshmon që Gjykata Speciale duhet doemos të merret me vrasjet e pasluftës së veprimtarëve të LDK-së, por edhe shpërfaq shqetësimin që disa kanë kohëve të fundit pse dalëngadalë faktet rreth këtyre vrasjeve do të dalin në dritë dhe ata që i kryen ato do të dalin para drejtësisë.
Krerët shtetërorë duhet urgjentisht të distancohen ndaj deklaratave të tilla dhe Nasim Haradinajt nuk duhet më t’i lejohet të hyjë në Kuvend dhe të kërcënojë deputetët ashtu siç bënte në mandatin e kaluar. Kosova nuk do të jetë në paqe përderisa plagët e vrasjeve të pasluftës janë akoma të hapura”, ka shkruar Vjosa Osmani. (B.H/Faxweb)
Discussion about this post