Viti 2024 ka shënuar një rritje të ndjeshme të punësimit në radhët e të rinjve deri në moshën 29 vjeç, falë ndërhyrjes së Zyrave të Punës dhe programeve të specializuara të trajnimit dhe ndërmjetësimit.
Drejtoresha e Shërbimeve të Tregut të Punës, Gertiola Çepani, bëri të ditur se 40% e punësimeve të realizuara këtë vit kanë përfshirë të rinjtë, ndërsa programet për zhvillimin e aftësive digjitale, si ai i kodimit, janë ndër më të kërkuarit dhe më të suksesshmit.
“Punësimi apo pjesëmarrja e tyre në kurset e formimit profesional, në programet e nxitjes së punësimit apo integrimin direkt në tregun e punës është goxha më i rritur. Kanë kërkesa për disa nga fushat kryesore, siç është hoteleri-turizmi, teknologjia e informacionit dhe komunikimit, ndërtimi dhe shërbimet. Programi i kodimit ka qenë ndër më të suksesshmit për të rritur aftësitë digjitale të të rinjve, mbi 90% janë të rinj”, deklaroi Çepani.
Procesi i aplikimit është gjithnjë e më i lehtësuar, duke u përshtatur me aftësitë teknologjike të brezit të ri. Të rinjtë mund të aplikojnë si fizikisht pranë Zyrave të Punës, ashtu edhe në mënyrë elektronike përmes portalit puna.gov.al ose shërbimeve të portalit e-Albania.
“Në portalin e punësimit, të gjithë të rinjtë, duke hapur llogarinë e tyre, mund të aplikojnë direkt për vendet e lira të punës pa ndërmjetësimin e Zyrave të Punës,” shtoi Çepani.
Nga ana tjetër, grup-mosha mbi 50 vjeç mbetet më e vështira për t’u punësuar, për shkak të interesit të ulët të kompanive për të punësuar apo rikualifikuar këtë kategori. Sektorët ku kjo grup-moshë është më e përfshirë janë tregtia, akomodimi ushqimor dhe industria përpunuese.
