Po zhvillohet gjatë ditës së sotme në Gjykatën Penale të Tiranës seanca për caktimin e masës së sigurisë për 87 të arrestuarit e tjerë në kuadër të operacionit kundër lojërave të fatit.
Pjesa e parë e tyre u njohën me masën e sigurisë ditën e diel, ndërkohë që seanca e sotme pritet të zgjasë, për shkak të numrit mjaft të madh të të arrestuarve.
Mes personave të vënë në prangat e policisë, është edhe Gramoz Murataj, i cili ka pretenduar se së bashku me punonjësit e tij kishin ndërtuar një kompani call center.
Por përveç se nuk ka pasur asnjë regjistrim të një biznesi të tillë, Prokuroria ka konstatuar se Murataj dhe punonjësit që u gjetën në një ambient, nuk dinin fare italisht, dhe veprimtaria e tyre online kryhej për vendosjen e basteve.
Gramoz Murataj, është njëri nga pronarët e kompanisë së basteve “eço bet” në Shqipëri, kompani të cilin ai e ka menaxhuar më vëllanë e tij Besnik Murataj.
Murataj ka pasur probleme në gjykatën e Vlorës, pasi ishte arrestuar nga policia e këtij qyteti me qëllim ekstradimin e tij në Itali, ku ishte dënuar në 2004 nga gjykata e Leçes, me 4 vite e 6 muaj burgim për trafik droge.
Bazuar në mandat-arrestin italian, Murataj u arrestua nga policia në vendlindjen e tij Vlorë në prill 2013. Si gjykata e shkallës së parë edhe ajo e Apelit në Vlorë e miratuan kërkesën për ekstradim drejt Italisë, por menjëherë pas këtij vendimi, Murataj u arratis nga banesa ku ishte caktuar masa e “arrestit në shtëpi”.
Kërkesa për ekstradim e tij në Itali në fund u hodh poshtë nga Gjykata e Lartë në janar 2014, e cila vendosi të prishë të dy vendimet e shkallës së parë dhe të Apelit Vlorë, ku ka refuzuar kërkesën e autoriteteve italiane për dorëzimin e këtij shtetasi në Itali. Që prej kësaj periudhe Gramoz Murataj, ka vijuar të qëndrojë i lirë duke kryer aktivitet në fushën e basteve sportive.
Discussion about this post