Pushimet mund të ishin kthyer në tragjedi, dalin pamjet nga Jala, gomonia doli disa metra në breg. Si është gjendja e çiftit të lënduar

Policia ka dhënë njoftimin në lidhje me ngjarjen e ndodhur në plazhin e Jalit, ku një gomone përplasi dy pushues që ishin duke pushuar në breg.

Policia njofton se gjendja e pushuesve është jashtë rrezikut për jetën, ndërkohë që është ndaluar drejtuesi i gomones për t’u marrë në pyetje.

Siç shihet edhe nga pamjet, gomonia ka dalë në zonën e rërës dhe gurëve, ndërkohë që kjo ngjarje rikthen në vëmendje rrezikun që iu kanoset pushuesve nga mjetet e ujit që lejohen pa kriter, dhe nuk kontrollohen nga autoritetet.

Jo në pak raste, ka pasur incidente, ndërkohë që ky i sotmi rrezikoi jetën e çiftit të të rinjve.

Njoftimi i policisë: 

Sot, rreth orës 11:20, në plazhin e Jalës, shtetasi Gj. P., 37 vjeç, duke drejtuar një mjet lundrues tip (gomone), dyshohet se ka humbur kontrollin duke dalë në breg, ku si pasojë ka dëmtuar shtetasit A. S., 31 vjeç dhe E. GJ., 25 vjeçe, të cilët janë transportuar në spital, jashtë rrezikut për jetën.

Drejtuesi i mjetit lundrues është shoqëruar në Komisariatin e Policisë Himarë, për veprime të mëtejshme.

Grupi hetimor ndodhet në vendngjarje dhe po punon për sqarimin e plotë të rrethanave të ngjarjes.

(E.K/Faxweb.al)