Gazetari Bill O’Reilly, drejtuesi i emisionit më të ndjekur të lajmeve në stacionet kabllore amerikane, është pushuar nga puna pas akuzave për ngacmime seksuale ndaj punonjësve femra.
Fox News, ku O’Reilly punonte prej vitesh dhe ku ai ishte një ndër faktorët kryesorë për popullaritetin e kanalit, nxori një deklaratë ku e cilësonte vendimin të nevojshëm.
O’Reilly u bëri rezistencë akuzave, duke thënë se ishin të motivuara thjesht nga dëshira për përfitime monetare dhe për të dëmtuar karrierën e një personi të suksesshëm.
E ardhmja e tij në Fox News filloi të vihej në pikëpyetje pas një artikulli të New York Times-it më 2 prill, ku thuhej se pesë gra kishin marrë pagesa të ndryshme nga rrjeti Fox News për të mbyllur akuzat e ngritura kundër O’Reilly.
Emisioni i O’Reilly-t, që në 2015 solli për rrjetin FOX 178 milionë dollarë të ardhura nga reklamat, mori goditje direkte nga tregu, pasi kompanitë filluan të anulojnë reklamat sapo u bënë publike akuzat seksuale, raporton Washington Post.
Një presion i fuqishëm erdhi edhe nga aktivistët kundër ngacmimeve seksuale në vendin e punës, të cilët organizuan protesta para redaksisë së Fox News në New York City me thirrjet për pushimin e gazetarit.
Opinionet janë të ndara lidhur me vendimin e Fox News. Shumë shikues shprehen se do t’u mungojë emisioni i tij. (M.D/ Shuplaka)
