Kreu i PD-së Lulzim Basha ka folur në Kuvendin Kombëtar të PD-së për gjendjen në të cilën ndodhet Shqipëria.
Basha e përshkroi këtë gjendje si të mjerë dhe fajtor për këtë bëri qeverinë dhe kryeministrin Rama.
Por kreu i PD-së bëri edhe njëherë të qartë se ai dhe PD nuk do të vijnë në pushtet “mbi kufoma”përmes protestave të dhunshme, siç artikulohet gjerësisht edhe në media,” sipas tij.
Basha tha se PD ka mbështetur dhe mbështet protestat e qytetarëve, por pushteti sipas tij nëse shndërrohet në një synim që të merret me çdo kusht qoftë edjhe përmes protestave të dhunshme, atëherë historia na mëson, përfshirë edhe Ramën dhe PS-në që ata që vijnë në këtë mënyrë në pushtet kthehen në dhunuesit e qytetarëve.
“Nuk do të vijë kurrë në pushtet mbi kufoma, demokratët nuk e duan pushtetin eduke future në luftë shqiptarët e duke i përçarë”, – tha Basha ndër të tjera.
Ai gjithashtu tha se, mbështes plotësisht qytetarët që protestojnë kundër prishjes së Teatrit, apo studentët që protestojnë kundër reformës në arsim.
Kreu i PD-së duke foluar edhe rreth protestës së studentëve tha se, “Rinia studentore ka flakur inercinë e mosveprimit e heshtjes duke na dhënë shembull. Shqipëria ka nevojë jo vetëm për energjinë dhe ndershmërinë e rinisë, por mbi të gjitha për një mentalitet të ri politik, për një qasje të re ndaj politikës dhe për një politikë ndryshe. Prej një shekulli politika ka qenë e keqja mes shqiptarëve”.
Ai u shpreh se vendi ka nevojë për një mentalitet të ri politik, qasje të re, politikë ndryshe. Sipas Bashës, Politika ka qenë shpesh e keqja, pengesë, ndarje sesa bashkim, mjet në duart e disave për të grabitur e sunduar të tjerët. “Sot kemi nevojë për një politikë perëndimore, për veprime të vërteta jo parulla e predikime e fjalë në erë, kjo nuk është e lehtë por as e pamundur,” – tha ai.
Kreu i Partisë Demokratike përsëriti se duhet një brez i ri politik, elitë e re e vendit e aftë për këtë aspiratë të re të ndryshimit.
“Fitorja më e madhe është përgatitja e kalimit të politikës në duart e një elite të re, duhet të ndërtojmë rrugën për kalimin e madh drejt brezit të ri. Hapja e rrugës për këtë ndryshim të madh arrihet përmes ndërtimit të një sistemi politik, ekonomik e shoqëror të hapur, të lirë e demokratik”.
Basha u shpreh se propaganda mizore i ka bindur shqiptarët se nuk është puna e tyre kur qeveria prish banesat, stadiumin apo teatrin, sepse nëse ata që ngrenë zërin burgosen.
Sipas tij, kjo propagandë i ka kthyer shqiptarët kundër njëri-tjetrit, se të tjerët janë shpellarë, ngelësa, armiq.
“Rama me klikën e tij të kalbur, po i shtyn shqiptarët drejt cinizmit, duke i bindur se të gjithë janë njësoj, se nderi nuk ekziston, se e mira publike ka vdekur, se të gjithë bëjnë pazare, shiten e blihen, dhe shqiptarët nuk kanë pse të besojnë te askush dhe asgjë”.
Basha tha se siç janë partitë ashtu është edhe qeverisja e vendit. E vetmja garanci që qeverisja e nesërme të jetë demokratike – tha ai -është që PD të jetë sot demokratike, ne duhet të jemi të vetëdijshëm se ndryshimi është i vështirë dhe nuk ndodh menjëherë.
(B.H/Faxweb)
