Pushteti/”Buxheti 2024″, Sharka: Kaloi për 5 minuta! Ceko: Na drejtojnë njerëz që janë super-idiotë ose super-inteligjentë

Në studion e emisionit “Pushteti” mbrëmjen e sotme u diskutua kalimi i buxhetit në parlament ditën e djeshme. Të ftuarit e gazetarit Besnik Sulejmani në studio ishin: Agron Haxhimali, Enriko Ceko dhe Eduart Sharka. Ndërsa në lidhje Skype ishte deputetja e Partisë Socialiste, Mirela Pitushi.

Haxhimali u shpreh se kalimi i buxhetit për 5 minuta ndodh pasi politika shqiptare ka huqin e të mbyturit të mendimeve alternative. Ai i bën thirrje mazhorancës të lërë opozitën të flas dhe të jap mendimin e vetë.

Agron Haxhimali: Politika shqiptare ka një huq. Mendimi alternativ ka qëllim ta mbysi. Në këto 30 vite është mazhoranca më e ashpër që ka pasur Shqipëria. Edhe pse je kundërshtar, nuk trajtohet mendimi alternativ si mendim armiku. Si aktivist i bëj thirrje mazhoranës të japë hapsirën kujtdo të flasi.

Ndërsa Eduart Sharka shprehet se për këtë buxhet duhet të kishte diskutime solemne dhe debate konstruktive.

Eduart Sharka: Secili ka të drejtë të hedh idetë për buxhetin. Nuk është se diskutimi për buxhetin do të ndryshonte diçka, thjesht për informacion për qytetarët. Duhet të kishte diskutime solemne. Ka ndodhur diçka tjetër që kemi këtë gjendje. Edhe sikur opozita të dilte nga ai aksion politik dhe të fliste për buxhetin nuk do ndyrshonte ndonjë gjë. Ky ligj kaloi për 5 minuta. Diskutimi konstruktiv është kur opozita dhe ekspertët paraqesin mendimet dhe mazhoranca nuk i merr në konsideratë. Buxheti i qytetarëve nuk është sllogan. Duket nga treguesit. Ato e tregojnë.

Eksperti Enriko Ceko thotë se në Shqipëri ka njerëz me logjikë qytetarë, ndryshe nga ata që drejtojnë vendin. Pasi ata për të, janë ose super-inteligjentë ose super-idiotë. Ai shton se shumë prej punonjësve të administratës publike paguhen nga shërbime sekrete të huaja.

Enriko Ceko: Në Shqipëri shumica janë njerëz të thjeshtë. Përpara logjikës së qytetarëve na drejtojnë ca njerëz që ose janë super inteligjentë ose super idiotë. Jemi në një situatë kaosi, ku ata që janë atje lartë edhe sikur të jenë super inteligjentë apo super idiotë nuk ka ndonjë dallim, nuk po na zgjidhin hallet. Kemi 33 vjet në këtë situatë. Ose aty kanë dorë shërbimet sekrete që nuk janë miqësore me Shqipërinë. Një pjesë e mirë e punonjësve të administratës publike shqiptare paguhen nga shërbimet sekrete të huaja.