Kalimi i buxhetit të shtetit nen për nen ditën e sotme në Parlament në vetëm 7 minuta është tema në emisionin “Pushteti” në Fax News me gazetarin Besnik Sulejmani.
I ftuar në studio, eksperti i çështjeve zgjedhore Kristaq Kume u shpreh se Parlamenti po kalon një situatë jo normale, pasi deputetët nuk po kryejnë detyrën e tyre. Kume thotë se deputetët duhet të ulen dhe të diskutojnë për ligjin më të rëndësishëm për shtetin, siç është ai i buxhetit.
Nga ana tjetër, ai thotë se mazhorancat në vendin tonë gjithmonë nuk kanë pranuar Komisione Hetimore kur këto nxjerrin zbuluar qeverinë.
Kristaq Kume: S’është normale sepse buxheti është i rëndësishëm. Është një ndër ligjet më të rëndësishme për mazhorancën, nëse mazhoranca nuk e kalon dot kalohet në zgjedhje të parakohshme. Është shoqëruar ky proces miratimi me seanca maratonë me orë të tëra më përpara. Flisnin të gjithë deputetët. Por parlamenti po kalon një situatë jo normale. Pasi deputetët nuk po kryejnë detyrën, të ulen në karrige dhe të diskutojnë. Duhet të bëjnë atë për të cilën janë mandatuar. Pra të kontrollojnë mazhorancën. Instrumenti bazë është Komisioni Hetimor dhe kjo i mohohet. Pa u zgjidhur kjo sipas tyre nuk ka kuptim asgjë tjetër. Natyrisht e gjithë kjo është situata më e keqe e mundshme që mund të kalojë parlamenti. Mënyra se si dhe sa të mandatuarit tonë e realizojnë atë për të cilën na e kërkuan votën. Shkaku është që të paktën, të gjitha Komisionet që kërkon opozita janë të tilla që nxjerrin keq mazhorancën. Nuk ka rëndësi kjo: ka rëndësi ajo që është shkruar në Kushtetutë. Në nenin 77: Me kërkesën e 35 deputetëve ngrihet Komisioni Hetimor për një çështje të rëndësisë së veçantë. Në mënyrë të vazhdueshme ka pasur përplasje mes pakicës dhe mazhorancës. Mazhoranca nuk ka pranuar, s’ka qenë e gatshme.
Discussion about this post