Një incident është shënuar sot në Vlorë, ku një pushues sllovak ka prishur qetësinë publike ndërsa ishte nën efektin e alkolit.
Pasi efektivët e policisë e kanë shoqëruar 29-vjeçarin sllovak të merrte trajtimin mjekësor, ai ka krijuar një tjetër situatë të paprecedentë, duke thyer një xham. Pas këtij incidenti është dëmtuar në krah një nga punonjësit e policisë.
DETAJET E POLICISË:
Sot rreth orës 01:10, në Sallë Operative Vlorë ka ardhur një telefonatë se, në lagjen ”Uji i Ftohtë”, në një hotel , një shtetas i cili ka qenë i akomoduar në hotel, ka shkaktuar prishje të qetësisë së rendit publik.
Shërbimet e policisë kanë shkuar menjëherë ku kanë konstatuar një shtetas i cili ka qenë nën efektin e alkoolit (në gjendje të dehur).
Shërbimet e policisë së Rendit Publik kanë bërë shoqërimin për në Spitalin Rajonal Vlorë, për të marrë një trajtim mjekësor, shtetasin M.S., 29 vjeç, banues në Slloveni.
Gjatë kohës që merrte trajtimin mjekësor, ka krijuar një tjetër situatë duke thyer një xham, nga i cili ka mbetur i dëmtuar në krahë një punonjës i policisë.
Gjithashtu ky shtetas ka goditur me grusht edhe punonjësin tjetër të policisë i cili e mbante nën mbikëqyrje.
Menjëherë kanë ndërhyrë shërbimet e tjera të policisë, për neutralizimin e tij.
Policia ka bërë arrestimin në flagrancë të shtetasit të lartpërmendur për veprat penale ”Prishja e qetësisë publike” dhe ”Goditje për shkak të detyrës”, parashikuar nga nenet 274 dhe 237 e Kodit Penal (D.D/Shuplaka)
Discussion about this post