Presidenti rus Vladimir Putin ka refuzuar dhuratën e qeverisë japoneze. Bëhet fjalë për një qen.
Deputeti japonez Koichi Hagiuda, i cili bëri publik lajmin, nuk ka dhënë ndonjë arsye se pse dhurata ishte refuzuar.
Në vitin 2012, Japonia i dhuroi Putinit një qen femër të rracës Akita të quajtur Yume. Kështu, kësaj radhe Japonia donte t’i dhuronte presidentit rus një qen tjetër, për t’i bërë shoqëri atij të parit.
“Për fat të keq kemi mësuar nga homologët tanë, se shpresa jonë për t’i paraqitur një dhëndër presidentit rus për Yume-n u bë copash.”, ka shkruar deputeti në blogun e tij.
Nëse do të ishte pranuar, kjo dhuratë do t’i paraqitej presidentit rus javën e ardhshme në një takim me kryeministrin japonez, Shinzo Abe.
Qentë Akitas e kanë origjinën nga Japonia veriore.
Putin njihet për pasionin e tij për qentë, prandaj është i çuditshëm refuzimi i kësaj dhurate.
Presidenti rus zotëron gjithashtu një pastor bullgar të quajtur Buffy, i cili i është dhënë atij nga kryeministri bullgar në vitin 2010.
Madje njëherë, Putin mori me vete një nga qentë e tij në një takim me kancelaren gjermane Angela Merkel, e cila i ka fobi.
Kjo ka ndodhur në vitin 2007, kur disa media raportuan se Putin e kishte bërë këtë me qëllim për ta trembur Merkelin. Por në fillim të këtij viti, presidenti rus është shprehur se nuk dinte gjë lidhur me këtë fobi të kancelares gjermane.
“Kur mësova se ajo nuk i pëlqen qentë, i kërkova falje, sigurisht.”, është shprehur Putin për një gazetë gjermane.
