“Regjimi i Kievit me mbështetjen e drejtpërdrejtë të shërbimeve speciale të huaja po ndjek rrugën e terrorizmit shtetëror”, tha presidenti rus.
Presidenti rus Vladimir Putin tha sot se do të kishte një përgjigje “të ashpër” ndaj shërbimeve të huaja speciale që sipas tij synojnë të destabilizojnë Rusinë duke ndihmuar regjimin ukrainas.
“Regjimi i Kievit me mbështetjen e drejtpërdrejtë të shërbimeve speciale të huaja po ndjek rrugën e metodave terroriste, praktikisht terrorizmit shtetëror ”, tha Putin në një videomesazh me rastin e Ditës publike të agjentëve të sigurisë.
“Ato janë akte sabotimi kundër instalimeve civile, infrastrukturës së transportit dhe energjisë, sulme kundër civilëve dhe përfaqësuesve të autoriteteve,” vazhdoi ai.
Disa sabotime të linjave hekurudhore në Rusi dhe sulme me dronë që i atribuohen regjimit ukrainas janë raportuar që kur Moska filloi sulmin e saj ndaj Ukrainës në shkurt 2022.
“Ne duhet t’i japim fund rreptësisht përpjekjeve të shërbimeve speciale të huaja për të destabilizuar situatën politike dhe sociale në Rusi”, nënvizoi Vladimir Putin.
“Shërbimet e sigurisë nuk kanë detyra të lehta. Por ju keni të gjithë potencialin e nevojshëm, të gjitha mundësitë për të garantuar sigurinë e shtetit, shoqërisë, qytetarëve tanë”, përfundoi presidenti rus.
