Presidenti i SHBA-së, Donald Trump, tha këtë të dielë se Ukraina do të ketë nevojë për raketa “Patriot” për mbrojtjen e territorit të saj. Deklarata e tij erdhi pasi bisedoi në telefon me homologun Volodymyr Zelensky të premten dhe shprehu pakënaqësi me refuzimin e Presidentit rus Vladimir Putin për t’i dhënë fund luftës.
Trump u tha gazetarëve në bordin e Air Force One se pati një bisedë të mirë me Zelenskyn, duke përsëritur se ishte “shumë i pakënaqur” për bisedën e tij me Putinin një ditë më parë, dhe pranoi se kishte marrë një refuzim të udhëheqësit rus për të punuar armëpushimin.
Kur u pyet nëse Shtetet e Bashkuara do të pranonin të dërgonin më shumë raketa “Patriot” në Ukrainë, siç kërkoi Zelensky, Trump tha: “Ata do të kenë nevojë për to për mbrojtjen… Do t’u duhet diçka sepse janë goditur mjaft rëndë.” Trump vlerësoi efektivitetin e raketave Patriot, të cilat ai i tha se ishin “mjaft të mahnitshme”.
Kur u pyet për perspektivat e një armëpushimi, Trump tha: “Është një situatë shumë e vështirë… Jam shumë i pakënaqur për bisedën time me Presidentin Putin. Ai do t’i shkojë deri në fund, thjesht të vazhdojë të vrasë njerëz. Kjo nuk është mirë”.
Zelensky sakaq tha se pranoi të punonte për rritjen e aftësisë së Kievit për të “mbrojtur qiellin” ndërsa sulmet ruse përshkallëzohen, duke shtuar në një mesazh në Telegram se kishte diskutuar prodhimin e përbashkët të armatimit mbrojtjes, si dhe blerjet dhe investimet e përbashkëta, me udhëheqësin amerikan.
Ukraina i ka kërkuar Uashingtonit t’i shesë më shumë raketa dhe sisteme “Patriot”, të cilat i konsideron thelbësore për mbrojtjen e qyteteve të saj kundër sulmeve ajrore në rritje ruse.
Vendimi i Uashingtonit për të ndaluar disa dërgesa armësh në Ukrainë ka nxitur paralajmërime nga Kievi se ky veprim do të dobësojë aftësinë e tij për t’u mbrojtur kundër sulmeve ajrore ruse dhe për të përparuar në fushën e betejës.
Gjermania tha po ashtu se ishte në bisedime për të furnizuar Kievin me sisteme mbrojtëse ajrore Patriot për të kapërcyer hendekun e krijuar. Një burim i njohur me bisedën midis Trump dhe Zelensky i tha Reuters se ata ishin optimistë se dërgesat e raketave Patriot mund të rifillonin pas asaj që e quajtën një bisedë “shumë të mirë” midis dy presidentëve.
Trump tha se foli gjithashtu me kancelarin gjerman Friedrich Merz në lidhje me kërkesën e Ukrainës për raketa Patriot, por se nuk ishte marrë asnjë vendim për të dërguar raketat e avancuara.
