Ka një pyetje me të cilën janë ngritur një pjesë e mirë e shqiptarëve sot. Saimir Tahiri, i larguar prej të premtes në Gjermani, është kthyer në Shqipëri apo jo?!
Sipas asaj që vetë ish-ministri kishte thënë, kthimi i tij do të bëhej të shtunën pasdite, ndërkohë që dje e ka shtyrë edhe me një ditë.
Këtë shqetësim e kanë shprehur një pjesë e mirë e opinionbërësve edhe në rrjetet sociale ku nuk kanë munguas as ironitë. Të presim edhe të shohim nëse kthimi i Tahirit do të bëhet sot në mbrëmje.
PO PSE TAHIRIT NUK IU BLLOKUA PASAPORTA:
Prokuroria e Krimeve të Rënda nuk ia kufizoi lëvizjen jashtë shtetit ish-ministrit të Brendshëm, edhe pse këtë e kishte si një nga pikat e kërkesës së saj drejtuar Parlamentit.
Shumica parlamentare, në vendimin e saj e ka pranuar këtë kërkesë të Prokurorisë, me përjashtim të dhënies së autorizimit për arrestimin e Tahirit. Vendimi i Kuvendit i miratuar me votat e Partisë Socialiste, i firmosur nga kryetari i tij, Gramoz Ruçi i jep të drejtë Prokurorisë edhe për moslejimin e Tahirit të dalë jashtë shtetit.
“Vendosi pranimin e kërkesës së Prokurorisë pranë Gjykatës së Shkallës së Parë për Krime të Rënda, Tiranë për: Dhënien e autorizimit për kontrollin personal dhe të banesës për deputetin e Kuvendit të Republikës së Shqipërisë Saimir Tahiri. Dhënien e autorizimit për ndalimin e daljes jashtë shtetit, detyrimin për t’u paraqitur në Policinë Gjyqësore, ndalimin dhe detyrimin për të qëndruar në një vend të caktuar, si masë shtrënguese të heqjes së lirisë në kuptim të shkronjave “a”, “b” dhe “c”, të nenit 232, të Kodit të Procedurës Penale”, thuhet në vendimin e Kuvendit.
Udhëtimi jashtë Shqipërisë i ish-ministrit të Brendshëm Saimir Tahiri vjen pas një heshtjeje të gjatë publike e mungesës së dy ditëve më parë në Parlament, ku emri i tij u risoll në vëmendje gjatë diskutimeve.
(E.K/Faxweb)
Discussion about this post