Kryebashkiakja e Gjirokastrës Zamira Rami reagon pas lajmit që qarkulloi sot në disa media, se një paciente e ka pështyrë në fytyrë gjatë një vizite në spitalin e qytetit, teksa ajo po e uronte për 8 marsin.
Rami thotë se lajmi i publikuar në portalin “Jugu News” nuk është aspak i vërtetë madje ka publikuar edhe një video nga vizita e saj në spital.
“Edhe në këtë ditë, portale online, si “Jugu News”, pioniere të lajmeve të rreme që nuk përfaqësojnë aspak Jugun e mrekullueshëm të Shqipërisë, fabrikuan një lajm më qesharak se qesharakja.
Ne zgjodhëm të dhurojmë lule, ata gënjeshtra të paskrupullta.”, reagon Rami.
Sipas mediave lokale pacientja ishte treguar agresive me kryetaren e bashkisë, pasi kjo e fundit e kishte dëbuar nga zyra e saj disa muaj më parë, kur gruaja kishte shkuar për një vend pune si sanitare në Bashki, gjë që ja kish premtuar në fushatën elektorale të 2015.
REAGIMI I KRYEBASHKIAKES
Sot është një ditë-homazh për çdo grua, sakrificat, lodhjen, dashurinë pa kushte që ajo ofron.
Edhe në këtë ditë, portale online, si Jugu Neës, pioniere të lajmeve të rreme që nuk përfaqësojnë aspak Jugun e mrekullueshëm të Shqipërisë, fabrikuan një lajm më qesharak se qesharakja.
Ne zgjodhëm të dhurojmë lule, ata gënjeshtra të paskrupullta.
Ne ishim pranë nënave që sot nuk mundën të festonin, disa të tjerë përdorin gjithë forcën e intelektit për të prodhuar “skandale” ndaj grave që drejtojnë duke i shërbyer komunitetit. Ne ecim përpara për një të ardhme të re disa të tjerë vazhdojnë të notojnë në hilet dhe truket e vjetra. Ne promovojmë përkujdesjen dhe dashurinë, ata nxisin baltosjen.
Mbi baltën e hedhur do të mbjellim lule.
Gëzuar 8 Marsin të gjitha nënave dhe motrave dhe një falenderim i veçantë për zonjat në spitalin e Gjirokastrës, të cilat ma mbushën zemrën me dashuri. (D.D/Shuplaka)
Discussion about this post