Muaji janar i këtij viit të ardhshëm do t’u mundësojë të gjitha bizneseve të kryejnë online dhjetëra pagesa tatimore. Këtu përfshihet: pagesa e tatim-fitimit, pagesa e tatimit të lojërave të fatit të biznesit, pagesa e tatimit mbi të ardhurat personale apo pagesa e taksave kombëtare.
Gjatë një takimi me përfaqësues të biznesit në vend, drejtoresha e Agjencisë Kombëtare të Shoqërisë së Informacionit, Mirlinda Karçanaj , bëri të ditur se prej janarit të vitit të ardhshëm biznesit do t’i mundësohet të kryejë online dhjetëra pagesa tatimore, duke nisur nga pagesa e tatim-fitimit, pagesa e tatimit të lojërave të fatit të biznesit, pagesa e tatimit mbi të ardhurat personale apo pagesa e taksave kombëtare.
“Nga ana tjetër, nisma e Drejtorisë së Përgjithshme të Doganave për kryerjen online të deklaratave doganore po merr formë konkrete dhe shumë shpejt do të gjeni në portal një pjesë të këtyre shërbimeve, ndërkohë që po punojmë ngushtë me institucionin për të mundësuar në formë elektronike të 24 aplikimet për deklarata doganore. Si një vlerë e shtuar e këtyre shërbimeve do të vijë edhe pajisja me nënshkrim elektronik e agjentëve doganorë, për të garantuar një aplikim më vlerë ligjore dhe sipas standardeve bashkëkohore”,- vijoi Karçanaj.
Sipas Karçanaj dorëzimi i bilanceve përmbledhëse të bizneseve është një prej procedurave më të suksesshme që kryhet prej 3 vjetësh përmes portalit e-Albania.
“Besoj se shumëkush këtu e ka përjetuar vite me parë makthin e dorëzimit të bilanceve në Qendrën Kombëtare të Bizneseve. Nën moton ‘e-Albania’, në funksion të plotë për qytetarin dhe biznesin”, 2017-a shënoi vitin e tretë që dorëzimi i bilanceve bëhet vetëm online. Mesatarisht 15 mijë bilance dorëzohen çdo vit në QKB, ndërsa janë evituar maksimalisht korrupsioni dhe vonesat burokratike. Për ta përmirësuar edhe më tej këtë shërbim, po punojmë për të zgjeruar numrin e fushave që para plotësohen automatikisht nga sistemet gjatë formularit të dorëzimit të bilancit, për të lehtësuar edhe më tej biznesin, duke i kursyer kohë dhe duke rritur saktësinë e informacionit të dërguar”,- vlerësoi Kryetarja e AKSHI-t.
Për të mundësuar uljen e kostove për të gjithë qytetarët, qofshin këta biznese apo individë të thjeshtë, Karçanaj ftoi biznesin të sjellin sugjerime konkrete, në kuadër të qendërzimit të shërbimeve TIK.
(F.M/Faxweb)
