Qëllon me armë zjarri, arrestohet 24-vjeçari nga Puka (EMRI)

Një incident është shënuar pasditen e sotme në qytetin e Pukës, ku një person ka qëlluar në ajër me armë zjarri duke terrorizuar kështu banorët.

Policia ka arrestuar personin që qëlloi me armë në rrugën pranë shtëpisë së vet në fshatin Gojan i Madh. Bëhet fjalë për  Martin Gjergjin, 24 vjeç. 

DETAJET E POLICISË
Me datë 03.05.2017 jemi njoftuar se ka të shtëna me armë zjarri në fshatin Gojan i Madh.

Menjëherë në drejtim të fshatit Gojan janë nisur forca të shumta policie si dhe grupi hetimor ku rezultoi se:

Në lagjen Brigjë, fshati Gojan i Madh, Njësia Administrative Gjegjan, Bashkia Pukë ku kanë konstatuar 46 gëzhoja model 56 të shpërndara në mënyrë të çrregullt në rrugën e shtëpisë së shtetasit Martin Gjergji.

Pas një kontrolli të bërë në banesën e këtij shtetasi dhe ambienteve përreth saj, u gjet e groposur një armë automatike Model 56, 7 krëhëra, ku 6 prej tyre ishin bosh ndërsa njëri kishte 25 fishekë brenda, të cilat u sekuestruan në cilësinë e provës materiale.

Shërbimet e Policisë kanë bërë kapjen dhe arrestimin në flagrancë të shtetasit:

Martin Gjergji, 24 vjeç, banues në Gojan i Madh, Pukë.

Materialet i kaluan Prokurorisë së Rrethit Gjyqësor Pukë për veprat penale “Prodhimi dhe mbajtja pa leje e armëve luftarake dhe e municionit” dhe “Prishja e qetësisë publike” të parashikuara nga nenet 278 dhe 274 të Kodit Penal. (D.D/Shuplaka)