Qeveria e Zelandës së Re e ka ndaluar shitjen e shtëpive ekzistuese për blerësit e huaj, duke thënë se neozelandezët janë të lodhur së qeni qeraxhinj në vendin e tyre.
Ministri i financave David Parker tha se masa synonte të bënte blerjen e një shtëpie më të përballueshme për banorët vendas.
“Ne mendojmë se tregu për shtëpitë dhe fermat e Zelandës së Re duhet të vendosen nga blerësit vendas, jo blerës jashtë shtetit”, tha Parker në një intervistë për The Guardian.
Në një fjalim në parlamentin e vendit të mërkurën ai tha se banorët e Zelandës së Re, nuk duhet të jenë qiramarrës në tokën e e tyre.
Vetëm një e katërta e të rriturve në Zelandën e Re zotërojnë shtëpinë e tyre, krahasuar me gjysmën e vitit 1991 dhe në pesë vitet e fundit janë rritur shifrat e banorëve e pastrehë.
Një raport i “The Economist” nënvizonte se Zelanda e Re ka çmimet më të papërballueshme të shtëpive në botë, me ato në Auckland që ishin rritur me 75 për qind në 4 vitet e fundit.
Ndalimi i shitjes së shtëpive për të huajt aplikohet tani për të gjithë, përjashtuar blerësit nga Singapori dhe Australia. Sipas të dhënave zyrtare, 10 për qind e shtëpive në Kuinstaun Lakes District dhe 20 për qind e shtëpive në Auckland ishin blerë nga të huaj.
Zelanda e Re është bërë një destinacion për blerësit australianë dhe aziatikë dhe ka fituar një reputacion si një strehë për të pasurit e botës, të cilët e shohin atë si një strehë të sigurtë nga një konflikt i mundshëm bërthamor, rritja e terrorizmit dhe trazirave civile, ose thjesht si një vend për t’u larguar nga të gjitha.
(E.V/Faxweb.al)
