Nënkryetarja e Lidhjes Demokratike të Kosovës, Vjosa Osmani ka treguar pse dështuan negociatat me Lëvizjen Vetëvendosje për krijimin e qeverisë së re.
Gjatë një interviste për “Pressing”, Osmani ka deklaruar për herë të parë se LDK i ka kërkuar edhe një javë kohë VV për negociata, por partia e Albin Kurtit nuk ka pranuar.
Sipas saj, raportet mes dy forcave politike janë dëmtuar rëndë së fundmi. “Çka ndodhi dje ka filluar nga pardje. Nga qëndrimi i Albin Kurtit nga një ofertë që e kishte bërë më herët, dhe njëfarë shpallje e dështimit të negociatave. Pas saj, natyrisht që LDK mbajti qëndrimin se mund të diskutojmë për pozitat për të cilat kemi folur më herët…
Kur shkuam në Kuvend tentuam të marrim vesh se çfarë po ndodh. Nuk morëm përgjigje. Ishim optimistë që mund të arrihej një marrëveshje. Kërkuam edhe një javë kohë nga VV, na thanë jo. Ia ka vlejtur barra qiranë të provojmë edhe një javë. Nuk ka pasur asnjë nevojë të merret një vendim i tillë, t’i dëmtojë raportet”, u shpreh Vjosa Osmani.
(M. I./ Faxweb.al)
