Korrupsioni do të jetë kryefjala e punës së prokurorisë për vitin 2019. Në rekomandimet që Këshilli i Ministrave i ka dorëzuar Prokurorisë së Përgjithshme, lufta kundër korrupsionit është prioriteti kryesor.
Në takimin mes ministres së Drejtësisë Etilda Gjonaj dhe kryeprokurores së përkohshme Arta Marku, u theksua se puna hetimore nga prokurorët duhet të përmbyllet në një kohë më të shkurtër. Vlen të theksohet se korrupsioni është një vepër penale për të cilën janë akuzuar dhe përfaqësues të lartë të vetë qeverisë, po deri tani nuk kemi asnjë ”peshk të madh” pas hekurave.
“Nevojitet një përpjekje më e madhe nga prokurorët për të mbyllur më shpejt proceset hetimore në mënyrë të pavarur. Vështirësitë që has organi i akuzës janë në një fazë të avancuar. Për vitin në vazhdim, Këshilli i Ministrave ka miratuar rekomandimet për vitin 2019 në luftën kundër kriminalitetit.
Rekomandimet kanë për qëllim parandalimin për luftën kundër korrupsionit, krimit të organizuar dhe respektimin e lirive themelore të të drejtave të njeriut. Prioritet do të jetë vijimi i reformës në drejtësi nëpërmjet reformës ligjore anti-krim që qevera do ndërmarrë nëpërmjet ndërhyrjes në Kodin Penal. Lufta kundër korrupsionit mbetet një sfidë për vitin 2019.
Nga të dhënat për vitin 2018 rezulton se ka një ulje të numrit të personave nën hetim. Ka një numër të vogël të dërgimit për gjykim të çështjeve penale. Për këtë arsye qeveria ka rekomanduar krijimin e një historiku solid për ndjekje penale. Po ashtu për vitin 2018 vihet re se numri i përgjithshëm i veprave të kallëzuara është 46.892, nga të cilat vetëm 109 janë veprat penale”, u shpreh ministrja e Drejtësisë Etilda Gjonaj.
Si prioritet i dytë në detyrat e Prokurorisë së Përgjithshme është renditur lufta kundër krimit të organizuar.
