Ditën e sotme do të rikthehet në kuvend ligji për magjistratët, për të cilin për disa javë me radhë, mazhoranca e Edi Ramës nuk po arrin të sigurojë 84 vota.
Edhe sot kjo nuk mund të ndodhë, sa kohë që opozita e bashkuar ka vendosur që të mos jetë pjesë e Kuvendit, duke vijuar bojkotin për këtë sesion të ri parlamentar.
Edhe pse eksponentë të opozitës nuk duan ta pranojnë që ky është bojkot, tashmë u bë javë që ata nuk marrin pjesë në seancat plenare, duke e zhvendosur Kuvendin e tyre në disa qytete të vendit, për të denoncuar prej andej lidhjet e qeverisë Rama me krimin.
Po sot PD përmes kryetarit të saj Lulzim Basha ka paralajmëruar se do të paraqesë ndryshimet ligjore sa i takon ligjit Antimafia.
Ndryshimet ligjore që do të paraqesin demokratët do të bëhen publike në një tryezë diskutimi, që do të mbahet në ‘Hotel Tirana’, ku i pranishëm do të jetë edhe kryetari i Partisë Demokratike Lulzim Basha.
Axhenda e Kuvendit:
Në rendin e ditës së sotme është parashikuar të diskutohen tre projektligje: “Për një ndryshim në ligjin nr. 102/2015, “Për sektorin e gazit natyror”, “Për disa ndryshime dhe shtesa në ligjin nr.8318, datë 1.4.1998, “Për dhënien me qira të tokës bujqësore e pyjore, të livadheve dhe kullotave që janë pasuri shtetërore”, të ndryshuar” dhe “Për aderimin e Republikës së Shqipërisë në aktin e Gjenevës të marrëveshjes së Lisbonës për emërtimet e origjinës dhe treguesit gjeografikë” .
Po ashtu, të mbartura për votim janë renditur edhe projektligji “Për disa shtesa dhe ndryshime në ligjin nr. 96/2016 “Për statusin e gjyqtarëve dhe prokurorëve në Republikën e Shqipërisë”, si dhe projektligji “Për një ndryshim dhe shtesë në ligjin nr. 8378, datë 22.7.1998 “Kodi Rrugor i Republikës së Shqipërisë”, të ndryshuar”, të cilët kërkojnë votim me shumicë prej 3/5 e të gjithë anëtarëve të Kuvendit.
(E.K/FAXWEB.AL)
