Qytetarët e Lezhës mbajnë të rrethuar komisariatin, kërkohet lirimi i Fran Frrokajt (Video)

Një grup i konsiderueshëm qytetarësh vijojnë të qëndrojnë para komisariatit të Policisë në qytetin e Lezhës.

Qytetarët kërkojnë lirimin e kreut të Bashkisë Fran Frrokaj, i cili u arrestua dy ditë më parë nga ana e Policisë. Bashkë me qytetarët janë edhe një pjesë e administratës së Bashkisë së Lezhës.

Mbi të dhe dhjetra zyrtarë të tjerë të Bashkisë së Lezhës qëndron akuza e tjetërsimit të pronave dhe shpërdorimit të detyrës. Tokat të cilat kanë qenë në pronësi të shtetit dyshohet se iu kanë kaluar personave të tretë në zonën e plazhit te ”Rana e Hedhun”.

Nuk dihet ende se kur do të dalë para gjyqit Frrokaj për tu njohur me rivlerësimin e masës së sigurisë ‘’arrest me burg”.

Qytetarët demokratë të Lezhës e cilësojnë arrestimin e kryebashkiakut si politikë. Dje në Lezhë për të parë nga afër atë që po ndodh ishte i pranishëm dhe kreu i Partisë Demokratike Lulzim Basha.

Basha tha se deri në fund ai do të besojë se Fran Frrokaj është i pafajshëm, ndërsa ftoi drejtësinë që të veprojë po njësoj për kryebashkiakët socialistë që akuzohen prej kohësh nga ana e opozitës.

(E.K/FAXWEB)

https://www.youtube.com/watch?v=LenolvLmKq4&feature=youtu.be