Pas ditësh të tëra luftimesh të ashpra qyteti historik i Palmirës është ripushtuar sërish nga luftëtarët e të ashtuquajturit Shtet Islamik. Zyrtarë të ruajtjes së Antikiteteve në qytet konfirmuan rimarrjen e Palmirës nga IS, duke e cilësuar këtë si një katastrofë dhe humbje të shpresës.
Vetë televizonet që mbështesin Shtetin Islamik, publikuan lajmin se se luftëtarët tashmë kontrollojnë ë gjithë qytetin e Palmirës, dikur një oaz i “rrugës së mëndafshit” që kishte monumente antike nga më të mrekullueshmet. Ky lajm është konfirmuar edhe nga Observatori sirian për të Drejtat e Njeriut. Kjo është hera e dytë, që grupi xhihadist pushton qytetin antik.
Majin e vitit të kaluar, xhihadistët sulmuan dhe morën qytetin. Gjatë 9 muajve që qëndruan aty, ata shkatërruan thuasje çdo monument antik dhe muzetë e qytetit. Amfiteatri i lashtë i Palmirës u përdor nga IS për të kryer ekzekutime në masë. Sipas analistëve Shteti Islamik priti kohën e duhur për të sulmuar, pasi ushtria siriane dhe forcat ruse janë të angazhuara në Alepo, ku janë fare pranë fitores.
