Betonizimi i kryeqytetit ka qenë padyshim një nga fenomenet më shqetësuese të viteve të fundit, me leje ndërtimi të dhëna për kulla shumëkatëshe, edhe në zona që kanë afërsi të madhe me qendrën.
Disa kantiere ndërtimi vijojnë të qëndrojnë të hapura, dhe nëse ditën Bashkia e Tiranës reklamon mbjelljen e pemëve dhe shtimin e hapësirave të gjelbërta, betonieret futen në punë fuqishëm natën dhe në orët e para të mëngjesit, kur sytë e vëmendshëm të qytetarëve mungojnë.
E megjithatë në fotot e mëposhtme të dërguara në redaksinë e Faxweb.al shihen dhjetra betoniere që kanë pushtuar kryeqytetin mëngjesin e sotëm, madje duke bllokuar për disa minuta dhe një prej korsive të rrugës pranë ETC-së.
Ndërtimi që po kryhet nga subjekti privat në këtë zonë ka krijuar shqetësim dhe për kalimin në trotuar të qytetarëve.
