Këshilli i Ministrave ka miratuar shpalljen e qytetit shqiptar të Përmetit, Qendër Historike. Vendimi i KM-së i jep një rol të rëndësishëm qytetit si qendër e zhvillimit të turizmit në juglindje të vendit.
Ministria e Kulturës në bashkëpunim me IMK-në dhe institucionet e tjera pas një pune të gjatë për vlerësimin e pasurive kulturore dhe qendrave të rëndësishme të trashëgimisë në të gjithë Shqipërinë, ka vendosur që në bazë të kritereve të përmbushura t’u japë atyre statusin e Qendrave të mbrojtura Historike.
Qendra Historike e qytetit të Përmetit e propozuar shtrihet rrëzë malit dhe përfshin të gjitha ndërtimet ekzistuese dhe shtrihet kryesisht në lagjet e Shënkollit (Varrosh), Teqesë, të cilat për nga kompozimi i ndërtimeve dhe rrugëve me kalldrëm, janë lagjet ku kanë mbetur gjurmët më të vjetra të qytetit.
Në të ndodhen dy objekte kulti: Kisha e Shën e Premtes, e ndërtuar në vitin 1776, dhe e shpallur monument kulture e kategorisë së parë; Kisha e Shën Kollit e shekullit 19-të. Ndërsa rrugicat e ngushta me kalldrëme datojnë që në fillim të shekullit të XIX.
Dallohen disa tipologji dhe teknika shtrimi si ratë dhe këlliç. Në çdo shtrirje rrugore ekzistonte një linjë qëndrore për kalimin e ujit, që pothuajse çdo ditë, hapej nga mullijntë për të garantuar pastrimin e rrugëve, portave dhe kopshteve.
Brenda Qendrës Historike spikasin ndërtime të shek. XX me vlera të veçanta që meritojnë statusin “Monument Kulture”. Përmeti dallon edhe për banesat karakteristike pavarësisht se të transformuara, prtat e harkuara dhe selvitë shumë vjeçare.
Zona e Mbrojtur në pjesën më të madhe përbëhet nga një zonë e gjelbër kryesisht në kodrën e Bolëngës që është një zonë e qytetit me potencial të madh arkeologjik dhe përfshin edhe kalanë e Bolëngës dhe disa banesa të ndërtuara në periudha të mëvonshme, me të cilat plotësohen me mirë vlerat e Qendrës Historike. (XH.A/SHUPLAKA)
