Operacioni “Plazhi i lirë” vijon me intensitet në zonat bregdetare të Vlorës, me fokus lirimin e hapësirave publike dhe verifikimin e ligjshmërisë së aktiviteteve të subjekteve private.
Gjatë kontrolleve të ushtruara më 19 korrik 2025, në zonën e plazhit në Radhimë, Policia e Vlorës në bashkëpunim me Agjencinë Kombëtare të Bregdetit dhe Policinë Bashkiake, konstatoi një rast tjetër të zënies së paligjshme të hapësirës publike dhe ndërtimit pa leje.
Në një hapësirë publike, ishte ndërtuar pa autorizim një objekt i tipit “beach bar”, ndërsa po ushtrohej aktivitet me çadra dhe shezlongë, pa lejet përkatëse.
Si rezultat i veprimeve procedurale:
-
U shpall në kërkim shtetasi Sh. N., 45 vjeç, banues në Tiranë, për ndërtim të paligjshëm dhe zënie të hapësirës publike.
-
U procedua në gjendje të lirë djali i tij 17-vjeç, për shkak të moshës.
Në cilësinë e provës materiale u sekuestruan 90 çadra dhe shezlongë, të cilat ishin vendosur në kundërshtim me ligjin.
Policia bën me dije se kontrollet do të vijojnë në të gjithë territorin bregdetar të qarkut Vlorë, me qëllim mbrojtjen e hapësirave publike, garantimin e aksesit për pushuesit dhe ndëshkimin e çdo abuzimi me vijën bregdetare.
Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme ligjore.
