Kryeministri Edi Rama ka njoftuar se Shqipëria do bashkohet me shtetet që kanë rënë dakord për të dëbuar diplomatët rusë dhe shtetasë të tjerë që kanë shkelur “interesat kombëtare”.
Deklarata e Ramës mësohet se është bërë gjatë mbledhjes së grupit parlamentar të PS-së.
“Qeveria do të vendosë për dëbimin e disa shtetasve rusë. Ky është një veprim i koordinuar me vendet e NATO-s. Do dëbojmë rusët që kanë shkelur interesat kombetare”, tha ai.
Në një deklaratë të ministrisë së Jashtme, bëhet me dije se ministri Bushati ka thirrur në zyrë, ambasadorin rus në Tiranë, Aleksandër Karpushin.
Bushati ka informuar Karpushinin notën verbale për dy diplomat rusë që janë shpallur të padëshirueshëm.
Deklaratë e Ministrisë për Evropën dhe Punët e Jashtme:
“Sot, në datë 26 mars 2018, në Ministrinë për Evropën dhe Punët e Jashtme u thirr Ambasadori i Jashtëzakonshëm dhe Fuqiplotë i Federatës Ruse në Republikën e Shqiperisë, SHTZ Aleksander Karpushin, të cilit i’u komunikua nota verbale për shpalljen si persona të padëshirueshëm të dy diplomatëve rusë, veprimtaria e të cilëve nuk përputhet me statusin e tyre diplomatik.“
(F.G/Faxweb.al)
